村屋全攻略!一文分析居住村屋利弊:交通、飲食、環境
村屋附近環境幽靜,通常可以養寵物,地方較大,連花園或天台種菜晾衫都得!但村屋係咪一面倒咁好?又有咩注意事項?即睇以下多角度分析,睇下村屋係咪咁好住!
村屋揀邊層?逐層利弊分析
- 三樓連天台
三樓連天台空間充足,想晾衫、種植、叫埋朋友BBQ都好方便。但夏天太陽直射天台,會令三樓室內溫度升高。另外,三樓連天台未必適合老人家,出入要行兩層樓梯唔方便。而三樓連天台通常租金較高,租住前要考慮一下。
- 二樓
村屋夾心層二樓租金較為相宜,啱晒預算緊拙嘅朋友。比起三樓同地下,二樓嘅戶外空間小,如果為戶外空間而租村屋就要留意!
- 地下連花園
同三樓一樣,地下層多咗花園嘅額外空間,住戶得閒可以喺花園Chill下。地下層最大問題在私隱度低,記得要做好保安措施免財物損失,出入都要鎖好門窗,仲要拉好窗簾。
村屋飲食 — 「無飯」一族要留意
村屋位置偏遠,如果經常叫外賣嘅朋友就要留意。揀選村屋嘅時候,最緊要留意該區有冇良好GPS定位,同埋速遞或外賣公司會唔會提供服務。
村屋居住 — 保安、網絡、水電、環境要小心
- 村屋水電供應
村屋常用石油氣或電爐煮食,如果用石油氣,就要定期預訂,仲要睇清楚點樣安全更換。講到電熱水爐,最緊要留意係即熱式定係儲水式,儲水式的話,沖涼速度就要加倍啦!
- 村屋環境
居住近郊要留意附近環境因素,例如住海邊村屋,傢俬可能容易受到風化而生銹。鄰近叢林密集,可能會比較多蛇蟲鼠蟻。
- 村屋網絡供應
由於村屋位置偏遠,事前記得了解上網速度同覆蓋。部分村屋未能選擇光纖服務,甚至有啲地區流動電話網絡無覆蓋。
- 村屋保安問題
頭先提過住村屋要留意保安措施,除咗安裝保安系統同鎖好門窗,亦需要留意附近村屋外牆門口會唔會有不知名符號,呢種符號多數係賊人預謀爆竊嘅記號。
部份新村屋屋苑,村口已經有24小時閉路電視、大閘、圍牆同保安人員駐守,令到居民更安心。單幢村屋就要留意有冇圍欄或圍牆,位置建議近路口,夜晚會有更多人經過,對小朋友同獨居女士較為安全。
村屋出行 — 揸車真係咁方便?
- 村屋公共交通安排
村屋附近公共交通選擇有限,租住前需要留意交通班次,同埋尾班車開出時間,避免經常大花金錢用的士出入。巴士站或小巴站通常喺村口位置,出入要多預步行時間。部份村屋鄰近郊遊打卡熱點,假日、行山季節都會大排長龍,等車時間又會耐咗。
- 村屋道路情況
睇村屋時記得留意路面有冇妥善維修,方便搬屋同出入,最好晚上都去視察一下,睇睇街燈照明情況。另外留意附近路段有冇路權問題,避免闖入私人地段,甚至會唔會有村霸霸佔道路影響日常生活。
- 村屋泊車
村內唔係所有空地都可以隨意泊車,亦避免停泊在大閘外面。車主記得事先向地產代理同業主查詢泊車事宜,有冇任何泊車費同額外收路費。
衡量過後同樣鍾情村屋,就要睇睇有咩租盤適合你啦,smartME搜羅全港各區村屋租盤,總有一款啱你心水!
【延伸閱讀】