好多人買樓前都會簡單計吓首期支出同供樓款項，睇住家庭負擔能力嚟物色筍盤🕵️♂️。但係買樓除咗首期同供款外仲有唔少雜費支出💸，包括印花稅、律師費、代理佣金、管理費按金、水電費按金等，種類繁多，可謂一闊三大，點都要細心計計條數嘅🤔。
- 首期 💰
首期支出比較容易計，政府2019年10月放寬按保樓價上限後，樓價1,000萬或以下物業可以承造8成按揭，800萬或以下可承造9成按揭，即係800萬嘅單位首期只需80萬。不過，使用高成數按揭要透過按揭保險公司承保，申請者要支付保費，按唔同成數同按揭年期收費，大約介乎貸款額1.15%至4.35%，但保款可加入貸款分期攤還🤩。 - 釐印費💰
釐印費係買樓其中一個最重要嘅支出，收費係按樓價計算，樓價愈高，釐印費都愈貴。大約介乎樓價1.5%至4.25%，以樓價600萬單位計算，釐印費3%，即18萬元，而且收費係以首次置業嘅香港永久性居民計算。🔔值得注意嘅係，政府近年推出唔少樓市辣招，入市前持有另一個住宅物業，釐印費一律懲罰性加至樓價15%，600萬單位釐印費要90萬元；不過如果購入新單位後，1年內沽出舊有單位可獲退稅，600萬單位可退稅72萬。 - 代理佣金💰
好多人買樓係透過地產代理穿針引線🤝，經紀佣金通常係樓價嘅1%。但係目前法例冇規定佣金金額或比率，換言之可以有「商量」。如果買一手新樓盤，佣金通常由發展商單方面支付。 - 律師費💰
物業交易涉及大量法律文律📤，都要透過專業法律人士進行，例如樓契、業權審核，如買家申請按揭，律師同時要處理按揭文件。通常買賣雙方會選用唔同嘅律師代表，以保障自身嘅利益。另外，律師會到土地註冊處進行屋契註冊，費用會計算入律師費；而律師費嘅多少，則據樓宇新舊同面積計算，因為樓齡太舊，涉及地權問題、文件更多，律師費會較高。現時坊間一般律師費開支大約3,000至10,000元，買新盤有時發展商會送律師費。 - 家居雜費💰
家居雜費包括管理費、水費、電費及煤氣費都需要俾按金，當中以管理費最多，視乎不同屋苑嘅要求，個別要預繳相等於1至3個月管理費嘅按金。值得注意嘅係，有時買一手新盤嘅家居雜費比二手樓仲貴，包括特別基金收費、會所營運按金、額外預繳管理費及清理廢料費用（泥頭費）等💁♂️。
